दार्चुला, ७ माघ । मङ्गलबार राति उपचार क्रममा काठमाडाँैमा निधन भएका नेकपा (एमाले)का पूर्व सभासद् गोपालसिंह बोहराप्रति आज दार्चुलामा श्रद्धाञ्जलि व्यक्त गरिएको छ ।
नेकपा (एमाले) जिल्ला कमिटी दार्चुलाको आयोजनामा भएको श्रद्धाञ्जलि कार्यक्रममा राजनीतिक दलका नेता तथा कार्यकर्ता र विभिन्न क्षेत्रका व्यक्तित्वले स्वर्गिय बोहराको फोटोमा माल्यापर्ण गरेका थिए ।
नेता बोहराको शोकमा तीन दिनसम्म कुनै पनि कार्यक्रम नगर्ने तथा गाउँ कमिटीले पनि श्रद्धाञ्जलिसभा राखेको एमाले दार्चुलाले जनाएको छ ।
मुटु रोगबाट पीडित बोहराको ६८ वर्षको उमेरमा हिजो निधन भएको थियो ।
बोहरा माओवादी लडाकुलाई नेपाली सेनामा समायोजन गर्नका लागि गठित सेना समायोजन विशेष समितिमा सदस्यसमेत हुनुहन्थ्यो ।
उहाँले २०६४ सालमा भएको पहिलो संविधानसभामा नेकपा (एमाले)बाट सभासद् बन्नुभएको थियो ।
