भीमदत्तनगर, १० फागुन । पश्चिमी सीमा क्षेत्रमा खटिएको सशस्त्र प्रहरीले पछिल्लो समय चोरी सिकारी नियन्त्रणलाई तीव्रता दिएपछि भन्सार राजस्वमा वृद्धि भएको छ ।
कञ्चनपुरको सीमा नाका गड्डाचौकी, बेलौरी र दोधारा–चाँदनीमा खटिएको सशस्त्र प्रहरीले खुला सीमा नाकाका कारण भारतीय सीमावर्ती बजारबाट अवैध रुपमा भन्सार छलेर नेपाल ल्याउन लागिएका सामान सीमामा बरामद गर्ने क्रम बढेको छ ।
शनिबारमात्रै सशस्त्र प्रहरी बल राजस्व तथा भन्सार सुरक्षा गुल्म गड्डाचौकीबाट खटिएको टोलीले भीमदत्त नगरपालिका–१३ पिपरैयाबाट भन्सार छलेर ल्याउँदै गरेको ट्र्याक्टरको ट्रली, उखु जोत्ने मेसिन र चारवटा नयाँ टायर महाकाली नदीमा बालुवामा लुकाएर ल्याउँदै गरेको अवस्थामा नियन्त्रणमा लिएको छ ।
सशस्त्र प्रहरी नायब उपरीक्षक नरबहादुर रावतले नियन्त्रित सामान रु दुई लाखबराबर मूल्य पर्ने जानकारी दिनुभयो । उहाँले सामान आइतबार कञ्चनपुर भन्सार कार्यालयलाई बुझाउने जानकारी दिनुभयो ।
केही दिनअघि रु ७५ हजारबराबरको अवैध इलेक्ट्रिकल सामानसमेत सोही टोलीले भीमदत्तनगरपालिका–११, भुजेला पुलक्षेत्रबाट राति नियन्त्रणमा लिएको थियो भने त्यसअघि पनि प्रहरीले नगरपालिकाको पिपरैया र जिमुवाबाट पनि अवैध दैनिक उपभोग्य सामान नियन्त्रणमा लिई भन्सार चलान गरेको सशस्त्र प्रहरी नायब उपरीक्षक रावतले जानकारी दिनुभयो ।
कञ्चनपुर भन्सार कार्यालयका प्रमुख भन्सार अधिकृत रामप्रसाद रेग्मीले सीमा क्षेत्रमा अवैध चोरी निकासीमाथि निगरानी बढेपछि भन्सार राजस्वमा वृद्धि भएको बताउनुभयो ।
